Rev 12 | AOM | STEP | Ëhi'amu gavodeje bogo gavaruëhi jië'e mu böröme gö ö'idöre jiamu. Ëmu hesi bëhoho magonahe gemu jiohijo. Majae niögu va'ëne ba'amë'e jiohijo. O höroho manaerore bamë'e jiohijo. O hesi simanore jije aho'obëhe 12 inovoromo bosö va'ëne didi'ahë'e jiohijo.

Revelation of John 12

Sigobu börömehu magonaho sihade jöhoje.

1 Ëhi'amu gavodeje bogo gavaruëhi jië'e mu böröme gö ö'idöre jiamu. Ëmu hesi bëhoho magonahe gemu jiohijo. Majae niögu va'ëne ba'amë'e jiohijo. O höroho manaerore bamë'e jiohijo. O hesi simanore jije aho'obëhe 12 inovoromo bosö va'ëne didi'ahë'e jiohijo. 2 Röhu hu dë'ëro jië'ëro raho'irögoro vi'ehe böröme baeromo hara'uoromo darugo'o jö'e dadovavohijo.

3 Ëhi'ego bogo gavarue mu böröme gö'o ö'idöre ruehijo. Ëmu hesi bëhoho kavuë'e sigobu börömo böröme jiohijo. Vörö'e mae jiohijo. Hesi simanoho aho'o övo gö mine övo göre niö'i jio'amohijo. O hesi danoho aho'obëhe övo gö mine övo gö mine jio'amohijo. O sigobu simanoho gemu gemu a masijehu io'amaruëhi jië'e bosöhuro didi'o'amë'e jio'amohijo. 4 Röhu jije aho'obëhe ö'idöre jio'amajoho niö'i gemu tariojaroho dirö'e gönö niö'i nugo'i dirö'e gönö gemu sigobu hesi uhohuro sa'are ujuoho io'amohijo. Ujuoho io'amoromo ë harihu raho'ië'aje magonaho hesi nuninö raromoromo muebehijo rahego harihoho i'iro. 5 Raromoromo muebe'ego rue magonahohuro harihoho rahohijo huro ijonö hujejo ha'itoho baeromo sa'ae dinö'e dinö'e raromarue aribövioho vörö'o muebejëvego jaburo hu gemu ejahoröhego. Amo harihoho raho'ego ë aho ma-majioho ba'ojio God-hu röho mare hijajire ë nugohijo. 6 Evare vëmohuro ju'ebiromo arue a rumo'e sa'are va'ohijo God-hu avohahade öri ari'ere ë hijego God-ro ajamiromo muebebe va'ego majae aho'o 1260 barë'iröhego.

7 Ëhi'ego ö'idöre muorovohijo. Anera böröme Michael'o huhu muebejëvaje anerahu'o ëho jaburo ri'öromo sigobohu'o muorovoruomohijo. Muorovo'ego sigobohu'o sigobu hesi anera ömo'ömohu'o mana muorovëmihijo. 8 Muorovëmi'ego rueho jaburo sigobohu'o hesi ariböviohu'o taemëvohijo. Taemëvoromo uëhijo: Ave ö'idöho ioro'ioremu vuonugo'i va'ohëjo. 9 Ëhi uënugoromo ë sigobu böröme ö'idöre jiajoho baba'amohijo. Ësigoboho ni'i'ivadire jiobe rovadoho hesi ihoho Devil o Satan jiohijo. Sa'ae dinö'e dinö'e raromarue aribövi sareramuibe juvaje ahoje. Hu'o hesi anera sisë ömo'ömohu'o sa'are baba'amëvohijo.

10 Baba'amëvamu hejodeje ö'idöre darugo'o uvavamu: Jaruvoho nosi Börömoho God-ro hesi darugoho röjahuiromo bövi mae namiromo sisëho noni ruahö'öjahuë'e höjo. O jaruvoho God-hu uavë'ëro böröme namiromo ajamuaje aho Kerisoro no muebejavuaje darugoho röjahuijë'e höjo. Ëhesi bëhoho jö sisë majahijaje aho baba'amë'e höjo. Huro God nosi A Börömo hesi nunire namiromo vae majae nosi ö mueno'o jabesi jö sisëho sareramiromo majahinövade höjo. Röhu jaruvoho baba'amë'e höjo. 11 Nosi Christian ö mueno'ohuro uvare höjo: God-are Sheep Harihoho köe rueromo guomë'ëro mae javuajë uvoromo hesi jöho ae sama'e majëhiromo ëhuro sisëho ruahö'öruomade höjo. Jabesi sinoho bogo uehorovo'i uvare höjo: No Keriso-are jöëni vuovë'oho iae hesi höjo. 12 Ëhuni ö'idöho mabëhe höjo. Ö'idöre jiaruje aribövioho mabëhe jëvaje nimorohohëjo. A'i sa'ahu'o jovohu'o vaevë'e höjo ë hesi bëhoho Satan hu ë abuejë'ego. Abuejë'ëro garomo uvaje höjo: Nasi majaho barë'irögoro ë'ajëromo vörö'iraejë'e höjo. Ëhi uvoruomohijo.

13 Ëhi'ego rue sigobohuro gavade baba'amë'ëro sa'are jiamu gagorovo aharihu rahade magonahoho ijumo'i siho baeromo va'ohijo. 14 Siho baeromo va'ego buruhi börömo hesi vivojoho niö'i magonahohuro God-aro baehijo ëhuro bioromo a rumo'e sa'are va'oromo hesi röhore hiröhëni. Hijego God-ro muebejego sigoboho ë magonahehu hijaje öri ari'eroho bogo va'ego vadune aho'obëhe niö'i gemu röhu ma-bisemu hesi ijore barëröhego. 15 Ëhi'ego sigobohuro jovo böröme hesi jö'ore otehö'öhijo ë jovohuro ruomoromo ë magonahehu jiajire va'oromo ë magonahoho bava'ojöro. 16 Jovoho otehö'ö'ego jovohuro magonahoho bae'i rue'ego sa'ahuro magonahoho ajamiromo tögöromo'ego jovohuro ë gagore va'o barëhijo. 17 Va'o barë'ego ë sigobohuro magonaho hesi örire vörö'iraeromo va'oromo magonaho hesi aboji harihu'o ioro'iorohu'o muorovo'i va'ohijo. Röhu ë aboji harihu'o jabesi bëhoho God-are jögoru ejahoromo Iesuare jö biririvoromo mae uehorovarue aribövioho jioruome. Ëariböviohu'o sigobohuro muorovo'i va'ohijo. 18 Ëhi'oromo ë sigobohuro va'oromo sö jovo riröre raromohijo.